អ៊ីស្រាអែល៖ ប្រភពពីមន្ត្រីអ៊ីស្រាអែលបានឱ្យដឹងនៅថ្ងៃចន្ទនេះថា នាយករដ្ឋមន្ត្រីអ៊ីស្រាអែល លោក បេនយ៉ាមីន ណេតាន់យ៉ាហ៊ូ (Benjamin Netanyahu) បានសម្រេចរំលាយគណៈរដ្ឋមន្ត្រីទទួលបន្ទុកសង្គ្រាមដែលមានសមាជិកចំនួនប្រាំមួយរូបហើយ នៅក្នុងការផ្លាស់ប្តូរដែលត្រូវបានគេរំពឹងទុកថានឹងកើតមានបន្ទាប់ពីការចាកចេញពីរដ្ឋាភិបាលរបស់អតីតឧត្តមសេនីយ Benny Gantz។

ជាបណ្ដោះអាសន្ន លោក Netanyahu ទំនងជានឹងធ្វើការពិគ្រោះយោបល់អំពីសង្គ្រាមនៅតំបន់ហ្គាហ្សាជាមួយនឹងរដ្ឋមន្ត្រីមួយចំនួនតូច រួមទាំងរដ្ឋមន្ត្រីការពារជាតិ Yoav Gallant និងរដ្ឋមន្ត្រីក្រសួងកិច្ចការយុទ្ធសាស្ត្រ Ron Dermer ដែលធ្លាប់ជាសមាជិកក្នុងក្បាលម៉ាស៊ីនគណៈរដ្ឋមន្ត្រីទទួលបន្ទុកកិច្ចការសង្គ្រាម។

នាយករដ្ឋមន្ត្រីអ៊ីស្រាអែល ត្រូវបានគេទាមទារឱ្យដាក់បញ្ចូលនូវរដ្ឋមន្រ្តីសំខាន់ៗចំនួន ២រូបរួមមាន រដ្ឋមន្ត្រីហិរញ្ញវត្ថុ Bezalel Smotrich និងរដ្ឋមន្ត្រីសន្តិសុខជាតិ Itamar Ben-Gvir ទៅក្នុងគណៈរដ្ឋមន្ត្រីទទួលបន្ទុកកិច្ចការសង្គ្រាមឡើងវិញ ដែលវាបានក្លាយជាបញ្ហាសំខាន់មួយនាំឱ្យមានភាពតានតឹងកាន់តែខ្លាំងឡើងជាមួយដៃគូអន្តរជាតិរួមទាំងសហរដ្ឋអាមេរិកផងដែរ។

គួរបញ្ជាក់ថា រដ្ឋមន្ត្រីហិរញ្ញវត្ថុ និងរដ្ឋមន្ត្រីសន្តិសុខជាតិបានចាកចេញពីរដ្ឋាភិបាលកាលពីសប្តាហ៍មុន ក្រោយពីមន្រ្តីសំខាន់ៗទាំងពីររូបបានអះអាងជុំវិញអ្វីដែលពួកគេបាននិយាយថា គឺជាការបរាជ័យរបស់លោកនាយករដ្ឋមន្រ្តី Netanyahu ក្នុងការបង្កើត និងដឹកនាំយុទ្ធសាស្រ្តសម្រាប់សង្រ្គាមក្នុងតំបន់ហ្គាហ្សា៕